ჰიპნოზის საიდუმლო არც მეცნიერებს ასვენებს და არც ჩვეულებრივ ადამიანებს. მაშინ, როცა მეცნიერებს აქვთ გარკვეული წარმოდგენა ჰიპნოზზე, იციან რა არის ის, რა შეუძლია და არ შეუძლია ჰიპნოზიორს, ჩვეულებრივი ადამიანები, რომლებიც არ არიან ჩახედული ადამიანის უმაღლეს ნერვულ სისტემაში, ათასგვარ ჭორს იგონებენ ამ მოვლენაზე. ასეთი ჭორების ერთ-ერთი წყარო ჟურნალ-გაზეთებია, რომლებშიც, მაგალითად, აღწერილია ის, თუ როგორ გაიხსენა ვიღაცამ თავისი წინა ცხოვრება. ქვემოთ მოყვანილია რამდენიმე მითი ჰიპნოზზე, რომლებიც საზოგადოების ნაწილს სიმართლე ჰგონია.

1. ჰიპნოზში ადამიანს ჰიპნოზიორი აგდებს.
ეს მთლად ასეც არ არის. პროფესიონალი ჰიპნოზიორები ხშირად იხსენებენ გამონათქვამს: "ნებისმიერი ჰიპნოზი თვითჰიპნოზია". საქმე ისაა, რომ ადამიანი თავად ვარდება ჰიპნოზში და იქიდანაც მალე გამოვა იმ შემთხვევაში, თუ ჰიპნოზიორი მას ხელს არ შეუშლის. ტრანსის მდგომარეობაში არავინ გაიჭედება.

2. ჰიპნოზით შეიძლება ადამიანის იძულება, გააკეთოს ის, რაც მას არ უნდა.
ეს მითი საკმაოდ გავრცელებულია და ნახევრად სიმართლეს წარმოადგენს. ადამიანის იძულება, გააკეთოს მისთვის უჩვეულო რამე, შესაძლებელია, თუმცა შეზღუდულად. მაგალითად, ადამიანი შეიძლება აიძულო ჭამოს ხახვი, იმ შემთხვევაში თუ შთააგონებ, რომ ეს, მაგალითად, ვაშლია და არა მხოლოდ გონება ჩათვლის მას ვაშლად, არამედ ორგანიზმიც. საინტერესოა, რომ ადამიანს თვალებიც არ აუცრემლდება ხახვის ჭამის დროს. მაგრამ იმის შთაგონება, რომ 25-ე სართულის ფანჯარა კარია და გასვლა შეიძლება, საკმაოდ ძნელია. ასევე ძნელია ჰიპნოზში მყოფი ადამიანის იძულება, ვინმე მოკლას, თუმცა თუ ის პროფესიონალი მკვლელია, მას ეს არ გაუჭირდება.

3. ჰიპნოზი - ეს ძილია.
სინამდვილეში ეს ასე არაა, თუმცა საკმაოდ ძნელია სხვანაირად აღწერო დაჰიპნოზირებული ადამიანის მდგომარეობა. უფრო სწორი იქნება თუ ამას ტრანსს დავარქმევთ. ტრანსის ერთ-ერთი მაგალითია, როცა მძღოლი დაღლილობისგან ითიშება და აქტიური რჩება მხოლოდ მანქანის ტარების მიმართ.

4. ჰიპნოზი სამკურნალო თერაპიაა.
ჰიპნოზი შეიძლება გამოყენებოდეს მხოლოდ როგორც დამხმარე საშუალება და არ შეიძლება იყოს მკურნალობის ძირითადი მეთოდი. ხანდახან, ჰიპნოზიორის მაგივრად სიტყვა ჰიპნოთერაპევტი გამოიყენება. ჰიპნოზს პრაქტიკაში მხოლოდ პროფესიონალები უნდა იყენებდნენ.

5. ჰიპნოზის დახმარებით ჰიპნოზიორს შეუძლია ყველაფრის გახსენება აიძულოს ადამიანს.
ეს განსაკუთრებით არასწორი მითია. ჰიპნოზში ყოფნის დროს ადამიანმა ბევრი რამ შეიძლება თქვას და ის, რაც მხოლოდ მისი ფანტაზიის ნაყოფს წარმოადგენს, შეიძლება რეალობად აღიქვას. ხშირად დაჰიპნოზირებული ადამიანი იმას ამბობს, რისი გაგებაც ჰიპნოზიორს სურს. სწორედ ამ მიზეზების გამო, ის ინფორმაცია, რომელიც ჰიპნოზიორმა მიიღო დამნაშავისგან, არ შეიძლება სანდოდ ჩაითვალოს და არ აქვს არავითარი წონა სასამართლოში. ახლა ჰიპნოზის დახმარებით დაკითხვა ცივილიზებული ქვეყნების უმეტესობაში აკრძალულია.