HTML (HyperText Markup Language) web გვერდის შესაქმნელი ენაა. HTML კოდს ჩვენი ბრაუზერი კითხულობს, ამუშავებს და ეკრანზე ის გამოაქვს, რაც იმ კოდში ამოიკითხა. როგორც იცით, ბრაუზერი არის პროგრამა, რომლის მეშვეობით ჩვენ შევდივართ ინტერნეტში და ვათვალიერებთ ვებ-გვერდებს. ყველაზე პოპულარულია Microsoft Internet Explorer, Opera, Mozilla და სხვა.

   მომხმარებელი იმ ბრაუზერს ირჩევს, რომელიც მოსწონს. თუმცა ბევრს Mozilla-ც აქვს, Opera-ც და IE-იც. ყველა ბრაუზერი სხვადასხვა კომპანიის პროდუქტია და ეს კომპანიები ცდილობენ იყვნენ მაქსიმალურად კონკურენტუნარიანი. ისინი თავის პროდუქტს ახალ ფუნქციებს და სერვისებს უმატებენ. ყველა ბრაუზერს აქვს პლიუსები და მინუსები. სხვადასხვა ბრაუზერი ერთსა და იმავე HTML კოდს სხვადასხვანაირად აღიქვამს და ამ განსხვავებების გამო რომელიმე საიტისთვის შეიძლება რეკომენდირებული იყოს Opera-ს გამოყენება და არა მაგალითად IE-ის. ამის გათვალისწინება საჭიროა საკუთარი საიტის შექმნის დროსაც. თქვენი გაკეთებული ვებ გვერდი ერთ ბრაუზერში შეიძლება კარგად გამოჩნდეს, ხოლო მეორეში რაღაც დეფექტები იქონიოს, ამიტომ შეეცადეთ ვებ-გვერდი სხვადასხვა ბრაუზერში შეამოწმოთ და კოდის ოპტიმალური ვარიანტი აირჩიოთ.